Puisi-Puisi Diani Chrifilda Kekung

KORBAN FANATISME

Cewe deng cowo atona

1 taong bukang nya gampang

mo cari tu wewene deng tuama

yang memang pas

cewe deng cowo atona

1 taong bukang nya gampang

hari-hari baku skola kalakuang

blakang bahu mall depe tampa ajar

cewe deng cowo atona

1 taong bukang nya gampang

mo cari tu orang tua pe

doa restu

kage-kage di rumah so punung krans

cek para cek nyawa malayang karena baygon

Cuma lantaran papa, mama, agama deng budaya

Lantaran nimbole mo kaweng

Acara 3 malang, kumawus, 40 hari, 1 taong

So lama lewat...

Sapa pe salah ??

Papa? Mama? Agama? Budaya?

Ato cinta sto??

131006

pagi-pagi..

kita tarbang di dekat-dekat

di ranting yang bole mo riki

nda percuma..

depe kicau merdu skali

bekeng tanang tu hati

siang-siang..

tu sayap ta so buka lebar

so ancang-ancang for mo tarbang

pas so di atas kita so lupa samua

kita nya sadar anging so lebe kancang

sore-sore..

kage-kage kita jatung

waktu sadar pe saki skali

kita tasangko di ranting

tagantong...

mangambang...

anging tiop kasana kamari

malam-malam..

kita sadar suasana so barubah

kita masih ja inga tu pagi-pagi

depe kicau merdu skali

SASTRA MUSIMAN

Tiap kali bismaba..

Ni senior-senior stel kata

Alasan suru bawa foto for kelengkapan data

Nintau kote for mo seleksi mene gaga

Tiap kali bismaba

Ni senior-senior stel kata

Alasan supaya kalo ada info penting bole mo calling

Nintau kote mo cari tau info pribadi

Tiap kali bismaba

Ni senior-senior stel kata

Alasan cuma tugas kirim surat cinta

Nintau kote cuma mo trima gaji

 Tiap kali bismaba

Ada yang trima gaji, ada yang nda

Yang trima syukur

Yang nda tunggu jo masi ada musim brikut..

TAWAR MENAWAR SEX

Sex skarang so jadi

Barang dagangan

Opa-opa bilang

Biar jo deng remaja

Yang penting ada tu kesat kamari

Dari pada maitua kwa so long-long

Om-om bilang

Biar jo jajan di luar

Yang penting bodi aduhai

Daripada maitua kwa konteiner

Cowo-cowo bilang

Biar jo deng maitua sandiri body pas-pas

Yang penting gratis

Daripada bayar lei..

Pranggang-pranggang bilang

Biar jo jajan takurang

Yang penting bli vivid dulu

Daripada nda...

PLAYBOY KABEL

Bukang kita mo angka

Mar

Nga memang gaga

Bukang kita mo tuduh

Mar

Nga memang pambadusta

Bukang kita mo manyangkal

Mar

Nga pe senyum memang  gaga

Bukang kita mo hujat

Mar

Nga memang nya ada hati deng perasaan

Bukang kita mo manyasal

Mar

nga memang so talalu

Bukang kita mo sumpah

Mar

Nga memang pasti mo ta balas